uz 
uz
en
ruAssalomu alaykum,
Ushbu tizimda siz quyidagi linklar orqali boshqaruv qismlarga o'tishingiz yoki, hisobotlarni yuborishingiz mumkin!
MAKTAB HUDUDIDA UY QURILMAYDI
Telegram tarmog‘idagi Muxbir Daliyev kanalida 2020 yil 25 dekabr kuni e’lon qilingan Andijon shahri, Bo‘ston dahasi, “Mash’al” MFY aholisining murojaati o‘rganilib, quyidagilar ma’lum bo‘ldi:
Murojaatda mazkur mahallada joylashgan 19-son umumta’lim maktabining sport maydoniga ko‘p qavatli uy-joy qurilishi rejalashtirilayotgani, maktab hududida uy qurish uchun hisoblash ishlari amalga oshirilayotgani bayon qilingan.
O‘rganishlar natijasida ma’lum bo‘lishicha, O‘zbekiston Respublikasi Prezidentining “Ipoteka krediti mexanizmlarini takomillashtirishga oid qo‘shimcha chora-tadbirlar to‘g‘risida” 2019 yil 28 noyabrdagi PF-5886-son Farmoni ijrosini ta’minlash maqsadida Andijon shahrida ko‘p qavatli monolit uy-joylar qurilishi rejalashtirilgan.
Yuqoridagi qaror asosida Andijon shahar Bo‘ston dahasidagi 19-son umumta’lim maktabi hududiga ko‘p qavatli turar-joy binosi qurilishi bo‘yicha tadbirkorlik sub’ektlari tomonidan takliflar bildirilgan. Biroq, tadbirkorlik sub’ektlarining maktab hududida ko‘p qavatli turar-joy binolari qurilishi haqidagi takliflariga Qurilish vazirligi tomonidan rad javobi berilgan.
Shuningdek, 19-son umumta’lim maktabi hududida qurilish-montaj ishlarini olib borish uchun Andijon viloyat qurilish Bosh boshqarmasi hamda Andijon shahar qurilish bo‘limi tomonidan hech qanday ruxsat beruvchi Shaharsozlik hujjatlari rasmiylashtirilmagan.
